पुटिनको निवासमाथि आक्रमणको दाबीपछि विश्व स्तब्ध ।
कोशी आवाज २०८२ पुस १५ गते मङ्गलबार ।
मोदी–ट्रम्पको कडा प्रतिक्रिया, युक्रेनद्वारा आरोप अस्वीकार
मोरङ । रुसले आफ्ना राष्ट्रपति भ्लादिमिर पुटिनको निजी निवासमाथि युक्रेनले ड्रोन आक्रमण गरेको दाबी गरेपछि अन्तर्राष्ट्रिय राजनीति थप तातेको छ। तर रक्षा तथा कूटनीतिक विषयका विज्ञहरूले यस्तो आक्रमण प्राविधिक रूपमा सम्भव भए पनि रणनीतिक रूपमा अर्थहीन र अत्यन्त जोखिमपूर्ण हुने बताएका छन्।
रुसी पक्षका अनुसार नोभगोरोड क्षेत्रस्थित लेक भाल्दाइको किनारमा रहेको राष्ट्रपति पुटिनको राज्य आवासलाई लक्षित गर्दै युक्रेनले ९१ वटा लामो दूरीका ड्रोन प्रहार गरेको थियो। यस घटनापछि रुसी विदेशमन्त्री सेर्गेई लावरोभले शान्ति वार्तासम्बन्धी आफ्नो धारणा पुनरावलोकन गर्नुपर्ने संकेत दिएका छन्।
युक्रेनी राष्ट्रपति भोलोदिमिर जेलेन्स्कीले भने उक्त आरोपलाई “रुसको अर्को झूटको श्रृंखला” भन्दै पूर्ण रूपमा अस्वीकार गरेका छन्। उनका अनुसार रुस शान्ति प्रक्रिया भाँड्न तथा थप ठूला आक्रमणको बहाना बनाउन यस्ता आरोप लगाइरहेको छ।
अन्तर्राष्ट्रिय सुरक्षाविज्ञहरूका अनुसार पुटिनका निजी तथा सरकारी निवासहरू रुसकै सबैभन्दा कडा सुरक्षा घेराभित्र पर्छन्। ती क्षेत्रमा अत्याधुनिक हवाई प्रतिरक्षा प्रणाली तैनाथ रहेकाले ड्रोन आक्रमण सफल हुने सम्भावना न्यून हुने उनीहरूको विश्लेषण छ। साथै, यस्तो प्रयासले युक्रेनलाई कूटनीतिक रूपमा गम्भीर क्षति पुर्याउने खतरा पनि रहेको बताइन्छ।
यस घटनाप्रति भारतका प्रधानमन्त्री नरेन्द्र मोदीले गहिरो चिन्ता व्यक्त गर्दै सबै पक्षलाई हिंसा अन्त्य गरी कूटनीतिक समाधानलाई प्राथमिकता दिन आग्रह गरेका छन्। भारतले सुरुदेखि नै रुस–युक्रेन युद्धमा शान्तिको पक्ष लिँदै आएको स्मरण पनि गराइएको छ।
अमेरिकाका राष्ट्रपति डोनाल्ड ट्रम्पले पनि पुटिनको निवासमाथि आक्रमण भएको दाबी “राम्रो संकेत नभएको” भन्दै असन्तुष्टि जनाएका छन्। विश्वका कुनै पनि नेताको निजी निवासमाथि आक्रमणको दाबीले युद्धलाई झनै खतरनाक मोडतर्फ लैजान सक्ने उनको चेतावनी छ।
विश्लेषकहरूका अनुसार यदि कुनै राष्ट्रप्रमुखमाथि प्रत्यक्ष आक्रमण भएको पुष्टि भएमा त्यसले अन्तर्राष्ट्रिय सुरक्षामा गम्भीर असर पार्दै आणविक युद्धसम्मको जोखिम बढाउन सक्छ। इतिहासमा पनि उच्च पदस्थ व्यक्तिमाथि भएका आक्रमणले ठूला युद्ध निम्त्याएको उदाहरणहरू रहेका छन्।
यसैबीच, पछिल्ला महिनाहरूमा रुसले युक्रेनमाथि ड्रोन र मिसाइल आक्रमण तीव्र बनाएको छ। युक्रेनका विभिन्न शहरहरूमा दैनिकजसो हवाई आक्रमण भइरहेका छन्, जसका कारण सर्वसाधारणको जीवन थप असुरक्षित बन्दै गएको छ।
कूटनीतिक विश्लेषकहरूको निष्कर्षमा, पुटिनको निवासमाथि आक्रमण भएको दाबीभन्दा पनि यसलाई आधार बनाएर युद्धलाई थप चर्काउने प्रयास भइरहेको संकेत बढी देखिन्छ। विश्व समुदायका लागि अहिलेको प्रमुख चुनौती भनेको सम्भावित ठूलो द्वन्द्व रोक्दै शान्ति वार्तालाई जीवित राख्नु नै हो।
