डीआइजी विनोद घिमिरेले कोशी प्रदेशको जिम्मेवारी सम्हाले : विषम परिस्थितिमा पनि अग्रपङ्तिबाट सेवा दिन निर्देशन ।
कोशी आवाज २०८२ मङ्सिर ११ गते बिहीबार।
विराटनगर । कोशी प्रदेश प्रहरी प्रमुखका रूपमा प्रहरी नायब महानिरीक्षक (डीआइजी) विनोद घिमिरेले औपचारिक रूपमा पदभार ग्रहण गरेका छन्। नेपाल सरकार गृह मन्त्रालयको मंसिर ८ गतेको निर्णयअनुसार कोशी प्रदेश प्रहरी कार्यालय, विराटनगरमा सरुवा भई आएका घिमिरेले मंसिर ११ गते कार्यभार सम्हाले।
उनीलाई प्रदेश प्रहरी तालिम केन्द्रका समादेशक प्रहरी वरिष्ठ उपरीक्षक (एसएसपी) गोबिन्द अधिकारी, प्रदेश प्रहरी कार्यालय विराटनगरका एसएसपी दीपक पोखरेल, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरी, कोशी प्रदेश प्रहरी गण रानी, जिल्ला प्रहरी कार्यालय सुनसरीका प्रहरी प्रमुखसहितका प्रहरी अधिकृतहरूले स्वागत गरेका थिए।
पदभार ग्रहणपछि कार्यालयको सभाहलमा आयोजित कार्यक्रममा उपस्थित प्रहरी अधिकृत, प्रहरी कर्मचारी तथा भर्चुअल माध्यममार्फत सहभागी जिल्ला प्रहरी प्रमुख र मुद्दा संचालन इकाइका प्रमुखलाई विषम परिस्थिति आए पनि अग्रपङ्क्तिमा रही उच्च मनोबलका साथ समाजमा अपराध नियन्त्रण गर्दै शान्ति–सुरक्षा प्रवाह गर्न निर्देशन दिएका छन्।
