रङ्गेली–८ मा तीन दिनदेखिको रहस्यमयी आगलागी : प्रहरी अनुसन्धानले छोरीकै संलग्नता खुलायो
कोशी आवज २०८२ मङ्सिर १४ गते आइतबार ।
मोरङ । रङ्गेली नगरपालिका–८, बेदामारी खोला किनारस्थित बस्तीमा विगत तीन दिनदेखि अज्ञात कारणले निरन्तर आगलागी भइरहेपछि गाउँभरि त्रास फैलिएको थियो। विभिन्न घर, गोठ तथा आँगनमा आकस्मिक रूपमा आगो सल्किने घटनाले स्थानीयवासी आतंकित बनेका थिए।
उजुरीपछि विस्तृत अनुसन्धान थालेको प्रहरीले प्रारम्भिक रूपमा प्राकृतिक वा आकस्मिक कारण अनुमान गरे पनि, पछिल्लो अनुसन्धानले घटनामा पीडित घरकै छोरी संलग्न रहेको प्रमाण फेला पारेको छ। विभिन्न स्थानमा उनले नै आगो लगाउँदै आएको सुराकी, विवरण तथा अन्य प्रमाणका आधारमा प्रहरीले उनलाई नियन्त्रणमा लिएको जनाएको छ।
निरन्तर आगलागीका कारण स्थानीयवासी असहज र त्रासमा थिए। “अचानक–अचानक आगो सल्किँदा गाउँमै केही अशुभ हुन लागेको जस्तो लाग्थ्यो,” एक स्थानीयले बताए।
प्रहरीका अनुसार घटनाको माग राख्ने सम्भावित कारण—मानसिक अवस्था, घरायसी तनाव वा अन्य व्यक्तिगतरुपी चुनौती—बारे थप अनुसन्धान भइरहेको छ। विशेषज्ञको परामर्शसहित विस्तृत अध्ययन गर्ने प्रक्रिया जारी राखिएको जनाएको छ।
तीन दिनदेखि निरन्तर बिघ्न पु¥याउँदै आएको आगलागी रोकिएपछि स्थानीयले राहतको अनुभूति गरेका छन्। आवश्यक कानुनी प्रक्रिया पूरा भएपछि घटनाबारे थप विवरण सार्वजनिक गरिने प्रहरीले जानकारी दिएको छ।
