भदौ २४ गते काठमाडौंका विभिन्न प्रहरी कार्यालयबाट लुटिएका पेस्तोलसहित तीन जना पक्राउ ।
कोशी आवाज २०८२ मङ्सिर ११ गते बिहीबार ।
मोरङ । काठमाडौं उपत्यका प्रहरी कार्यालय रानीपोखरीबाट खटिएको टोलीले दुईटा पेस्तोल र एक वटा म्यागजिनसहित तीन जनालाई पक्राउ गरेको छ। पक्राउ पर्नेहरूमा मकवानपुरका २५ वर्षीय निकेश विक, २५ वर्षीय सुरज विक र बागलुङका २५ वर्षीय बालकृष्ण गैरे रहेका छन्।
प्रहरीका अनुसार निकेश विकविरुद्ध २०८१ माघ ११ गते केन्द्रीय अनुसन्धान ब्युरो (CIB) मा मुद्दा दर्ता भएको खुलेको छ। उनी ‘आपराधिक विश्वासघात’ तथा ‘आपराधिक लाभ लिन नहुने’ कसुरमा फरार प्रतिवादी रहेको पाइएको छ।
यसबाहेक २०८१ भदौ ५ गते इलाका प्रहरी कार्यालय गौशाला, महोत्तरीमा दर्ता भएको चोरी मुद्दामा पनि उनी फरार थिए।
निकेश र सुरजले मंसिर ५ गते राति करिब २ बजे काठमाडौं बागबजारमा भोज फुड डेलिभरी गर्ने निरज चौधरीलाई पेस्तोल देखाएर धम्क्याएको र लुटपाट गरेको घटनामा संलग्न रहेको एसपी काजीकुमार आचार्यले जानकारी दिएका छन्।
