नवआयुक्त अधिकृतलाई कर्तव्यनिष्ठ बन्न प्रधानमन्त्री शाहको आग्रह । कोशी आवाज २०८२ चैत २६ बिहिवार ।
बिराटनगर । प्रधानमन्त्री Balen Shah ले नेपाली सेनाका नवआयुक्त अधिकृतहरूलाई कर्तव्यनिष्ठ, अनुशासित र जिम्मेवार भई राष्ट्रसेवामा समर्पित हुन आग्रह गर्नुभएको छ।
भक्तपुरको खरिपाटीस्थित नेपाली सैनिक प्रतिष्ठानमा आज आयोजित अधिकृत क्याडेट तालिमको आयुक्त पद प्रदान कवाज समारोहलाई सम्बोधन गर्दै उहाँले करिब ३६ महिनाको कठिन प्रशिक्षण सफलतापूर्वक पूरा गरी अधिकृत पद प्राप्त गरेका क्याडेटहरूलाई बधाई तथा शुभकामना व्यक्त गर्नुभयो।
उहाँले मातृभूमि र जनताप्रति पूर्ण समर्पित भई आफ्नो जिम्मेवारी निर्वाह गर्न आग्रह गर्दै सैनिक आचरण, ‘चेन अफ कमान्ड’ र अनुशासनको दायराभित्र रही सधैं कर्तव्यप्रति सजग रहनुपर्नेमा जोड दिनुभयो। फरक सामाजिक पृष्ठभूमिका जवानहरूको नेतृत्व गर्दै एकीकृत र सक्षम टोली निर्माण गर्न नवआयुक्त अधिकृतहरू सफल हुने विश्वास पनि उहाँले व्यक्त गर्नुभयो।
सो अवसरमा प्रधानमन्त्री शाहले उत्कृष्ट अधिकृत क्याडेटहरूलाई श्रेष्ठताको प्रतीक खुकुरी तथा छडी प्रदान गरी पुरस्कृत गर्नुभयो। उहाँको प्रमुख आतिथ्यमा सम्पन्न उक्त समारोहमा एक सय ८३ जना अधिकृत क्याडेटहरूले आयुक्त पद प्रदान कवाज प्रदर्शन गरेका थिए।
