कोशी आवाज २०८२ ३० गते आइतबार ।
विराटनगर । विशेष सूचनाका आधारमा सशस्त्र प्रहरी बल, नेपालले पर्साका विभिन्न स्थानबाट करिब १७ लाख रुपैयाँ बराबरका अवैध सामान, पशुचौपाया तथा एक मोटरसाइकल नियन्त्रणमा लिएर बीरगंज भन्सार कार्यालयमा बुझाएको छ।
बिओपी महादेवपट्टीबाट खटिएको टोलीले जिराभवानी गाउँपालिका–१, बलुवा स्थित मुस्तुफा मियाको घरमा भन्सार छलि भारतबाट ल्याई लुकाइ–छिपाइ राखिएको १५ कार्टुन (४५० थान) ‘लाभा’ कीप्याड मोबाइल फोन बरामद गरेको छ। बरामद मोबाइलहरूको मूल्य करिब ९ लाख रुपैयाँ बराबर रहेको सशस्त्र प्रहरीले जनाएको छ। सामान आवश्यक कारबाहीका लागि बीरगंज भन्सार कार्यालयमा बुझाइएको छ।
त्यसैगरी, नं. १३ गण पर्साबाट खटिएको अर्को टोलीले बीरगंज महानगरपालिका–२, भगुवा क्षेत्रमा BR 29 T 9411 नम्बरको मोटरसाइकलमा भारतबाट चोरी–छली ल्याई परवानीपुरतर्फ लैजाँदै गरिएको कपडा तथा किराना सामान बरामद गरेको छ। बरामद सामानको मूल्य ३ लाख ८० हजार ४२० रुपैयाँ तथा मोटरसाइकलको मूल्य १ लाख रुपैयाँ गरी करिब ४ लाख ८० हजार रुपैयाँ बराबरका सामग्री भन्सारमा बुझाइएको छ।
यसैबीच, सशस्त्र प्रहरी प्रसीसु गुल्म, बीरगंजबाट खटिएको टोलीले महानगरपालिका–१६ को सीमा क्षेत्रबाट ३ लाख २१ हजार ४२० रुपैयाँ बराबरका कपडा, किराना सामान र पशुचौपाया नियन्त्रण गरी भन्सारमा बुझाएको छ। गुल्म अलौबाट खटिएको टोलीले बिन्दवासिनी गाउँपालिका–५, झौवा क्षेत्रमा ११ हजार रुपैयाँ बराबरको तोरी पनि बरामद गरेको छ।
सबै सामग्री आवश्यक कानूनी प्रक्रिया अघि बढाउन भन्सार कार्यालयमा बुझाइएको सशस्त्र प्रहरी बल, नेपाल नं. १३ गण पर्साका सूचना अधिकारी विश्वराज योन्जनले जानकारी दिएका छन्।
