बैंक तथा वित्तीय संस्थामा पर्याप्त पैसा छ, लगानीको वातावरण बनाउनुपर्छ : गभर्नर
कोशी आवाज २०८२ कार्तिक २७ गते बिहिवार ।
काठमाडौं। नेपाल राष्ट्र बैंकका गभर्नर डा. विश्वनाथ पौडेलले बैंक तथा वित्तीय संस्थामा पर्याप्त रकम भए पनि लगानीको वातावरण नबन्दा समस्या उत्पन्न भएको बताएका छन्।
बुधबार नेपाल आर्थिक पत्रकार संघ (नाफिज) कार्यसमितिसँगको भेटमा गभर्नर पौडेलले भने, “अहिले हाम्रो प्रणालीमा पर्याप्त पैसा छ, तर लगानी हुन सकेको छैन। कहिले पैसा नभएर समस्या, कहिले पैसा धेरै भएर पनि समस्या हुने अवस्था आएको छ।”
उनका अनुसार क्षेत्रगत रूपमा पनि लगानीको उत्साहजनक अवस्था छैन। “सबै क्षेत्र शिथिल छन्, लगानीकर्ताको मनोबल कमजोर भएको छ,” उनले भने।
गभर्नर पौडेलले विगतमा बैंक, बीमा, एयरलाइन्स, टेलिकम, विद्यालय, अस्पताल र घरजग्गा क्षेत्रमा लगानी हुने गरेको स्मरण गर्दै पछिल्ला वर्षहरूमा ती क्षेत्रमा लगानी ठप्प भएको बताए। “कित्ताकाट बन्द भएपछि रियलस्टेट सुस्त भयो, विद्यालय र अस्पतालमा पनि लगानी रोकिएको छ। अब लगानी कहाँ गर्ने भन्ने प्रश्न उठेको छ,” उनले भने।
उनका अनुसार निजी क्षेत्रले नयाँ उद्योग सञ्चालनका लागि अनुमति पाउनसमेत कठिनाइ भोगिरहेको छ, जसका कारण लगानीकर्तामा आत्मविश्वास घटेको छ।
डा. पौडेलले थपे, “२०५८/६० सालमा मुलुकको बजेट करिब १ खर्ब रुपैयाँ थियो। अहिले बजेट १८–१९ खर्ब पुगिसक्दा पनि आर्थिक अवस्थाको सुधार भएको छैन।”
उनले पछिल्ला विभिन्न घटनाक्रमका कारण बैंक तथा वित्तीय संस्थाहरूको चालु आर्थिक वर्षको पहिलो त्रैमासिक वित्तीय विवरण (ब्यालेन्ससिट) प्रभावित भएको र तत्काल सुधारको अवस्था देखिँदैन भनेका छन्।
