उखु किसानहरूको काठमाडौं आन्दोलन तेस्रो दिन, पूर्व गृहमन्त्री श्रेष्ठको सहभागिता।
कोशी आवाज २०८२ भदौ १० गते मङ्गलबार
बक्यौता भुक्तानीको माग गर्दै काठमाडौंमा सुरु भएको उखु किसानहरूको आन्दोलन आज तेस्रो दिनमा पुगेको छ। किसानहरूले आफूहरूले उत्पादन गरेको उखुको उचित मूल्य नपाएको र थुप्रै वर्षदेखि मिल मालिकहरूले भुक्तानी नदिएको भन्दै काठमाडौंमा धर्ना तथा प्रदर्शन गरिरहेका छन्।
आन्दोलनमा नेपाल उखु उत्पादक महासंघ र उखु किसानहरूले सक्रिय सहभागिता जनाइरहेका छन्। किसानहरूले उखुको उचित मूल्य निर्धारण, पुराना बक्यौता तत्काल भुक्तानी गर्ने तथा कृषि नीतिमा किसानमैत्री व्यवस्था सुनिश्चित गर्न माग गरेका छन्।
सोही आन्दोलनमा नेकपा (माओवादी केन्द्र) का सांसद तथा पूर्व गृहमन्त्री नारायणकाजी श्रेष्ठ पनि उपस्थित भएका छन्। उनले किसानहरूको मागलाई सरकार र सम्बन्धित निकायले गम्भीरतापूर्वक सम्बोधन गर्नुपर्नेमा जोड दिएका छन्।
आन्दोलनमा सहभागी किसानहरूले सरकारलाई छिटो निर्णय लिन दबाब दिँदै, आफ्नो माग पूरा नभएसम्म आन्दोलन निरन्तर गर्ने चेतावनी दिएका छन्।
