उपसभामुखमा कांग्रेस र नेकपाको पनि दाबी संवैधानिक परिषद्मा सन्तुलन मिलाउन रास्वपाले कसलाई देला ?
कोशी आवाज २०८२ चैत २० गते शुक्रबार ।
विराटनगर । प्रतिनिधि सभाको सभामुखमा रास्वपाका उपाध्यक्ष डीपी अर्याल निर्विरोध निर्वाचित भइसकेपछि उपसभामुख कसलाई दिने भन्ने विषयमा राजनीतिक दलहरूबीच चासो बढेको छ। तर, सत्तारुढ दल राष्ट्रिय स्वतन्त्र पार्टी (रास्वपा) ले भने हालसम्म कुनै निर्णय नगरेको जनाएको छ।
संवैधानिक व्यवस्था अनुसार सभामुख र उपसभामुख एउटै दलबाट हुन नपाउने भएकाले उपसभामुख चयनको विषय थप पेचिलो बनेको छ। यही कारण विभिन्न दलहरूले उपसभामुखमा आफ्नो दाबी प्रस्तुत गर्न थालेका छन्।
रास्वपाका सभापति रवि लामिछाने ले उपसभामुखबारे अहिलेसम्म कुनै छलफल नै सुरु नभएको बताएका छन्। सिंहदरबारमा सञ्चारकर्मीसँग कुरा गर्दै उनले सभामुख चयनपछि मात्र उपसभामुखको विषयमा प्रवेश गरिने स्पष्ट पारे।
“पहिले सभामुखको प्रक्रिया सकौँ, त्यसपछि उपसभामुखबारे छलफलमा जान्छौँ,” उनले भने, “अहिलेसम्म कुनै दलसँग कुराकानी भएको छैन।”
यसैबीच प्रमुख प्रतिपक्षी नेपाली कांग्रेस ले उपसभामुखमा आफ्नो स्वाभाविक दाबी रहेको जनाएको छ। पार्टीका प्रवक्ता देवराज चालिसे ले प्रमुख प्रतिपक्षको हैसियतले आफ्नो दाबी रहने बताएका छन्।
त्यस्तै नेपाली कम्युनिस्ट पार्टी का तर्फबाट पनि उपसभामुखमा दाबी गरिएको छ। पार्टीका सांसद रमेश मल्ल ले उपसभामुख आफ्नो पार्टीले पाउनुपर्ने धारणा व्यक्त गरेका छन्।
यता अन्य दलहरूबाट पनि सम्भावित नामहरू चर्चामा आएका छन्। हर्क साम्पाङ नेतृत्वको श्रम संस्कृति पार्टी तथा राप्रपा मध्येबाट पनि उपसभामुख चयन हुन सक्ने चर्चा छ। यद्यपि राप्रपाभित्र भने यसबारे औपचारिक प्रस्ताव नआएको जनाइएको छ।
उपसभामुख चयनमा संवैधानिक परिषद् को शक्ति सन्तुलन मुख्य आधार बन्ने देखिएको छ। ६ सदस्यीय परिषद्मा प्रधानमन्त्री, प्रधानन्यायाधीश, सभामुख, राष्ट्रियसभा अध्यक्ष, प्रमुख प्रतिपक्ष दलका नेता र उपसभामुख सदस्य रहने व्यवस्था छ।
राष्ट्रियसभा अध्यक्ष नारायणप्रसाद दाहाल रहेको र प्रमुख प्रतिपक्षी दलको नेता कांग्रेसबाट हुने निश्चितजस्तै भएकाले रास्वपाले उपसभामुख चयन गर्दा परिषद्को शक्ति सन्तुलनलाई विशेष ध्यान दिने तयारी गरेको बुझिएको छ।
यसरी उपसभामुखको चयन अब राजनीतिक समीकरण र संवैधानिक सन्तुलनको केन्द्रमा पुगेको छ।
